लेकीच्या मायेने

फार हळवा झाला

वाघासारखा नवरा माझा 

पार ससा की हो झाला

वाटते त्याला काळजी

कोण येईल राजकुमार?

राजकन्येला माझ्या

ठेवील का तो सुखात?

कशी जाईल कन्या माझी

घर सोडून आपले दूर ?

नव्या घरी सार्यांशी 

जुळतील का तिचे सूर?

कसं असेल तिचं सासर?

मानेल ना तीला आपल?

जपेल का तिचं मन?

बघेल ना दुखलं खुपलं?

वाटेल का त्यांना कौतुक

लक्षात राहिल हिची आवड? 

कला गुणांसाठी तीला

मिळेल का थोडी सवड?

अल्लड माझी लेक

चुकली कधी चुकून  

आपलच लेकरू समजून

घेतील ना सांभाळून?

फुलपाखरू हे स्वच्छंद

रमेल का नव्या जागेत?

माझ्या अंगणातली ही वेल

बहरेल सासरच्या बागेत?

पाहुन त्याची तगमग

झाले मी चकीत

पंचवीस वर्षापूर्वीचा

हाच का माझा पती?

आज कळतय याला

कठिण असतं माहेर सोडणं

सहज सोप नसत 

सासरच्या घरी रुजणं

 

समजायला हे सारं

ह्याला वर्ष लागली इतकी 

जावयाला तरी माझ्या

कळुदे लग्नाच्याच दिवशी