सण आला नवरात्रीचा खिशाला आमच्या

सण आला नवरात्रीचा

खिशाला आमच्या चाट..

नऊ दिवस नव्या साड्यांचा

सौं ने घातला घाट... 

"मंगळवारी" साडी हवी

रंग जिचा "लाल"

पडलो बाहेर तिच्या संगे

घेऊन खिशात माल...1

हवी आहे "बुधवारी"

साडी "निळ्या" रंगाची 

सेम टु सेम जशी आहे

आपल्या वहिनींची...2

"पिवळी" साडी हवी म्हणते

नेसायची आहे "गुरूवारी"

बास झाल्या आता साडया

करतो मिनतवारी...3

"हिरव्या" रंगाची साडी

"शुक्रवारी" दाखविन नणंदेला 

अजुन पाच दुकाने फिरणे आहे

एवढयात कंटाळा कसा आला...4

"राखाडी" रंगाची आहे साडी

पण रंग तिचा विटला 

घेऊन टाकते ती आता

शनिवारी नेसायला...5

"केशरी" रंगाची साडी

तुम्ही घेतली आहे का कधीतरी

नेसुन जाऊ म्हणते मैत्रीणीकडे तुमच्या

येत्या "रविवारी"...6

"सफेद" रंगाची साडी

नेसतात शंकराच्या वारी 

म्हणुन नेसेन मी ही साडी

येणार्‍या "सोमवारी"...7

"गुलाबी" रंग आवडता तुमचा

म्हणून घेईन म्हणते 

वाढदिवस "म॔गळवारी" तुमचा

तेव्हाच नेसीन म्हणते...8

"आकाशी" रंग आहे

सासुबाईंचा आवडीचा

"बुधवारी" नेसुन खुश करते

नाहीतर राग त्यांना यायचा...9

सणाची साडी घेणारच आहात

तर घेऊ रंग "जांभळा" 

"गुरूवारी" दसर्‍याला नेसुन करु

साजरा प्रेमाचा सोहळा...10

चल म्हटले तसेही कधी काहीच

नाही मागीतलेस स्वतःला

नुसतीच राबतेस सगळयांसाठी

दिसत नाही का मला...

माझ्या तर्फे अजुन एक साडी

प्रेझेंट देतो मी तुला 

पाहुन माझे व्यक्त प्रेम

गलबलुन आले तिला...

किती करता प्रेम माझ्यावर

ठाऊक नाही का मला 

आता बोलु नका जास्त काही

रडू येईल मला...

करु प्रार्थना दोघे मिळुन

देवी जवळ या नवरात्रीला

नको लागु दे नजर कोणाची

आपल्या संसाराला...